~ विचार जगत ~

આમ થી બસ તેમ, ફરવાનું થયું
ક્યાંક ડૂબ્યાં, ક્યાંક તરવાનું થયું !

યાદ છે કૂંપળપણું મારૂં, મને
‘ને હવે ટાણું ય, ખરવાનું થયું !

કેટલા સંબંધમાં નિમિત્ત થયાં
કેટલા વિચ્છેદ કરવાનું થયું !

સાવ જો સાચું કહું તો, હરપળે
આંસુઓ પી ને, ઉછરવાનું થયું !

સાવ ખાલી હાથનો વૈભવ જુઓ
જ્યાં જુઓ  ત્યાં, કઈંક ભરવાનું થયું !

દૂર  કે નજદીકનો ક્યાં પ્રશ્ન છે ?
જેટલું ચડ્યા, ઉતરવાનું થયું !

રંજ કેવળ એટલો છે કે, સતત
જિંદગીથી ખુદ, થથરવાનું થયું !

ડો.મહેશ રાવલ